Në kuadër te hetimit të një organizate kriminale me shtrirje ndërkombëtare, me kërkesë të Prokurorisë se Posaçme, Gjykata e Posaçme e Shkalles së Parë për Korrupsionin dhe Krimin e Organizuar ka caktuar masat e sigurisë për 21 persona, ku përfshihen anëtarët e  organizatës kriminale, një zyrtar i lartë policie, një gjyqtar në detyre gjatë kryerjes së aktivitetit kriminal, një avokat dhe dy gazetarë.

Masat e caktuara të sigurisë janë si më poshtë:

Arrest me burg –  18 persona (përfshire ish gjyqtarin dhe zyrtarin e lartë të policisë së shtetit);

Arrest në shtëpi –  1 avokat;

Detyrim paraqitje në policinë gjyqësore –  2 gazetarë.

Operacioni për ekzekutimin e masave të sigurisë i cili po mbështetet nga Europol dhe agjencitë e tjera ligjzbatuese shqiptare dhe evropiane, është në vijim.

Me qëllim ruajtjen e integritetit të këtij operacioni, Prokuroria e Posaçme do të publikojë më shumë të dhëna rreth këtij hetimi ditën e nesërme. sn

Kryetari i Partisë Demokratike ka reaguar për masat e dhëna nga SPAK për 2 gazetarët, Elton Qyno dhe Artan Hoxha.

Berisha: Së fundmi, nuk mund ta mbyll këtë ekspoze para jush pa dënuar me forcën më të madhe vendosjen e masave kufizuese ndaj gazetarit guximtar Elton Qyno, i cili në një shërbim të madh ndaj vendit ka demaskuar me guximin më të madh lidhjet e Edi Ramës me krimin.

Rrëmbimi i tij nga Altin Dumani është një nga ngjarjet më dramatike në historinë e Shqipërisë.

Grabitja e telefonave të tij për të shpëtuar Edi Ramën nga dokumente që e kompromentojnë atë në mënyrën më serioze, duke filluar nga udhëtimi i tij në Aruba tek dhuratat gjysmë milionë euro, etj, etj, përbëjnë një akt kriminal të vërtetë në mbrojtje të Edi Ramës.

Kërkoj heqjen e menjëhershme të masave ndaj gazetarit Elton Qyno.

Sikundër i shpreh atij solidaritetin tim më të plotë dhe të PD.

Ata që vendosën këto masa, ata kërkojnë të mbyllin kanalet e transparencës së medieve.

Vendosja e masave njëkohësisht ndaj Elton Qynos, gazetarit guximtar dhe trim, me Artan Hoxhën, anëtar i damkosur i bandës së Bajrit të partisë, i paguar nga bandat, por i mbrojtur nga Altin Dumani, gjer së fundmi u detyrua të vendosë një masë arresti shtëpie, ndërkohë që informoi publikun se dokumente zyrtare faktojnë se Artan Hoxha ka shkelmuar detyrën e gazetarit dhe është bërë anëtar aktiv, i paguar i bandës Bajri-Gjoka të partisë.

Nuk kanë asnjë lidhje këta dy gazetarë me njëri-tjetrin, lidhja qëndron në poshtërsinë e Altin Dumanit, që kërkon t’i paraqesë të inkriminuar së bashku.

sn

Kreu i SPAK-ut, Altin Dumani, ka qenë pjesë e tryezës së organizuar nga Shoqëria Civile, për luftën kundër korrupsionit.

I vënë në akuzë nga publiku dhe opozita, ku rezulton se prokurorë të SPAK dhe gjyqtarë janë të korruptuar dhe lidhur me bandat kriminale, Altin Dumani ka filluar të lëshojë deklarata endemike se në sistem ka ende njerëz të korruptuar që kanë kaluar vettingun, dhe në vend që t’i hetojë, Dumani ia kërkon këtë gjë Shoqërisë Civile.

“Shoqëria Civile është e ftuar të bashkëpunojë me SPAK-un për tematika të caktuara”, tha Dumani.

Më tej, kreu i Prokurorisë së Posaçme foli për procesin e vetingut ku sqaroi se SPAK-u sot që flasim ka marrë në ndjekje penale gjyqtarë të Gjykatës Kushtetuese, gjyqtarë të Apelit, prokurorë të Përgjithshëm, të Shkallës së Parë, oficerë të Policisë Gjyqësore. Por nuk thotë dot pse rasti i arrestimit të prokurorit të Vlorë, Zarka, nuk u shoqërua me mërrjen në pyetje edhe të Taulant Ballës për Toyota Yaris?

Kujtojmë se SPAK dhe Prokuroria e Përgjithshme kanë fakte për Irena Gjoka-Maneku-Shpata, për shembull, të ardhura edhe nga Greqia dhe ajo vijon ende punën e pashqetësuar. Vetë Dumani nuk ka sqaruar ende vilën dhuratë që ka marrë nga kisha.

Me deklaratat e fundit, kreu i SPAK ka rrëzuar vetë gjithë reformën në drejtësi, pasi vetting-u ka qenë elementi bazë mbi të cilin u ngrit kjo reformë, sa kohë që aty është gjykuar politikisht dhe kanë hyrë në sistem njerëz të korruptuar, do të thotë se reforma është nul.

 “Ne nuk kemi qenë të verbër apo të shurdhër nga pretendimet e programeve të vetingut. Ne kemi regjistruar procedim penal në bazë të funksionit tonë duke marrë shkak dhe shërbyer si inidicie vetëm nga organet e vetingut.

Ne jemi të kujdesshëm dhe përpiqemi që persona të caktuar në institucion të bëjnë një filtrim të organeve të vetingut nëse në pamje të parë kemi indicie të korrupsionit ne kemi regjistruar procedim penal për gjykatë. Sa u takon mjeteve të provës dua të bëj një dallim për veprën penale, nuk lejohet përgjimi sepse nuk parashikon kriteret e neneve, ne i kemi përdorur llojet e përgjimeve apo mjete të tjera të kërkimit të provës.

Sa i takon në tërësinë e tyre, sot që flasim SPAK-u ka marrë në ndjekje penale gjyqtarë të Gjykatës Kushtetuese, gjyqtarë të Apelit, prokurorë të Përgjithshëm, të Shkallës së Parë, oficerë të Policisë Gjyqësore.

Shqetësimi më i madh nuk janë ata që janë shkarkuar, por ata që e kanë kaluar këtë proces dhe janë ende pjesë e sistemit dhe është rrezik sepse po kryejnë korrupsion”, tha Dumani.

sn

Deputeti i Partisë Demokratike, Ervin Salianji, i cili aktualisht vuan një dënim me burg si i burgosur politik i kësaj narkoqeverie , ka publikuar një tjetër letër nga qelia.

Salianji reflekton mbi gjendjen e tij, kushtet e burgut dhe realitetin e Shqipërisë së sotme. Ai i krahason kushtet e tij me atmosferën e rënduar politike dhe shoqërore në vend, duke kritikuar qeverinë për keqqeverisje dhe dështime institucionale.

Salianji përmend vrasjen tragjike të një 14-vjeçari, duke e cilësuar si simbol të dështimit të strukturave shtetërore për të mbrojtur qytetarët. Duke vënë theksin tek mungesa e reagimit masiv të shoqërisë, ai i bën thirrje qytetarëve të rezistojnë, të shprehen dhe të manifestojnë për ndryshim. Letra prek temën e apatisë dhe indiferencës, duke e konsideruar si rrezikun më të madh për demokracinë. Sipas tij, heshtja dhe mospjesëmarrja janë terreni ideal për forcimin e tiranisë. Për Salianjin, zgjidhja qëndron tek revolta dhe mobilizimi qytetar.

LETRA E SALIANJIT:

Letër nga qelia 6 #Manifesto

Nga Ervin Salianji

Për ta ndryshuar situatën, duhet të qendrojmë, të rezistojmë, të ngremë krye.

Shkurtimi i ditës, i ftohti dhe lagështira nuk e kursejnë këtë anë ku është vendosur burgu i Fierit dhe as qelinë nr 6. Këto kushte atmosferike nuk e bëjnë aspak më të mirë një dënim politik. Por, edhe më të rëndë e sjell atmosfera jashtë. Asnjë lajm i mirë nuk mbërrin nga askund në Shipërinë tonë. Punët po shkojnë përherë e më keq.

Teksa parakalon rëndshëm propaganda qeveritare sikur në polici dhe në Ministrinë e Brendshme po bëhet nami me konkurse e ndryshime, pasiguria për jetën ka shkuar në skaj.

Vrasja e 14-vjeçarit në derën e shkollës, pas një sherri të përsëritur, tregon dështimin skandaloz të gjithë qeverisë bashkë me atë dyzinë strukturash që ka në varësi, që janë aty, e kanë për detyrë të parandalojmë që tragjedi të tilla të mos ndodhin.

Nuk mundem as ta imagjinoj se si ndihen prindërit e Martinit. Ama në ekran pashë se i ati dhe e ëma u shfaqen me një kurajo të jashtëzakonshme. Dhe me një mesazh frymëzues. As histeri, as thirrje për hakmarrje. Dhe patën edhe empati, kur thanë se edhe prindërit e autorit s’duhet të jenë të lumtur, pasi asnjë baba nuk do që i biri të bëhet kriminel. Kërkuan drejtësi.

Ky ishte një prej manifestimeve më prekëse dhe më ndikuese besoj në opinion në kohët e fundit. Po ashtu dhe protesta që prindër dhe qytetarë bënë të enjten, marshimi i tyre nga vendi i ngjarjes tek Ministria e Arsimit, ku një ogertë u shfaq në një dritare për të kujtuar këdo se sa arrogante dhe e panndjeshme është rilindja.

Mësohet se fjala “Manifestim”, ka dalë më e popullarizuara, më e kërkuara në botë, sipas fjalorit britanik “Cambridge Dictionary”.

Në fusha të ndryshme, ka kuptim të ndryshëm. Ne si shoqëri në gjendjen ku jemi, kemi nevojë për sensin, manifestim, për të shprehur, për të kërkuar, për t’i dhënë zë asaj që aspirojmë, asaj që duam, asaj që meritojmë.

Europa ku duam të shkojmë, duket kaq larg me aktet që bën sot qeveria e kryeministri.

Vetëm një grimë, një hije, një tentativë reduktimi i lirisë të ketë, në një vend normal të kontinentit dhe në perendim, do të shohësh që kjo do të shoqërohej me manifestime masive.

Edhe pse sot pranohet nga shumë studiues se rreziku më i madh që i kanoset demokracisë është tirania e të ndenjurit mënjanë e qytetarëve, pra apatia.

Tek ne kjo është edhe më e theksuar për fat të keq. Dhe është po ashtu, terreni më i mirë për sunduesin që ka qejf ta shfaqë veten si artist.

Unë shpresoj se manifestimi, revolta, do ta gjejë humusin dhe tek ne dhe do të popullarizohet. Nëse duam një vend normal, duhet ta kërkojmë atë.

Nëse duam zgjedhje të lira e të ndershme, duhet të maniftojmë për to.

Nëse duam në fund të fundit drejtësi, duhet të gjakojmë për drejtësi.

Asgjë nuk vjen vetë. Aq më keq po tja lësh në dorë qeverisë dhe kryeministrit. Ai ka treguar se zgjedh banditin dhe trafikantin ndërkombëtar të drogës, përpara çdokujt tjetër. Dhe për të mbrojtur një të tillë, sajoi farsën më të paprecedentë gjyqësore, dhe urdhëroi dënimin tim me 1 vit burg.

Kjo erdhi, pasi unë bëra një manifestim. U shpreha, me zë të lartë kundër drogës, kundër kanabizimit, kundër krimit, kundër lidhjes së krimit me Ministrin e Brendshëm, me qeverinë, po në 11 vitë luftova e do vazhdoj të luftoj duke denoncuar modelin e kriminelit që kontrollon institucionet duke u kthyer në model për shoqërinë! Atë që shoqëria duhet ta izolojë Edi Rama e promovon, e ate që duhet ta prokovojë shoqëria si model qeveria e mënjanon dhe e syrgjynos.

Duke parë pasojat, dikush mund të mendojë se manifestimi qenka me kosto. Por, padyshim se më e lartë është kostoja e heshtjes, e qendrimit mënjanë.

Të gjitha paudhësitë e të keqiat, të gjitha të ligat e qeverisjes që kemi, e planeve djallëzore për ndarjen e pasurive dhe të buxhetit të shtetit me klientelë, përvetësimi dhe grykësia e madhe ministrore, këtë dëshiron. Që të mos ketë manifestim e revoltë!

Po shqiptarët nuk duan këtë. Kjo është e sigurtë. Po për ta ndaluar, e për ta ndryshuar situatën, duhet ta kërkojnë, të qendrojnë, të rezistojnë, të ngrenë krye. Të manifestojmë. #26Nëntor

Vendimi vetëkundërshtues i Gjykatës Kushtetuese për kërkesën e kryetarit të PD, Sali Berisha, ka qënë temë e diskumit që moderatoja e Syri, Armela Ferko, ka zhvilluar me konstitucionalistin Bledar Dervishaj.

Devishaj theksoi në fjalën e tij se përbërja e GJK është vullnet i tre institucioneve kryesore të vendit, Parlamentit, Presidentit dhe Gjykata e Lartë. Në shumë vendimmarrje të saj Gjykata Kushtetuese ka surprizuar për mirë komunitetin e juristëve, por po ashtu në shumë raste ka surprizuar për keq, siç është rasti i fundit për vendimin ndaj Berishës.

“Nuk është një zhillim pozitiv për drejtësinë dhe as për të ardhmen se si këto çështje të kësaj natyre mund t’i ndeshim sërish përpara asaj trupe gjyqsore. Na ka surprizuar GJK për keq edhe në rastin e marrëveshjes së dy kryeministrave, italian dhe atij shqiptar për çështjen e emigrantëve. Po të shikojmë shumë qartë se si gjykata të niveleve të zakonshme në Itali po vendosin masa preventive për kthimin e emigrantëve aty ky kanë qenë, ndërkohë që kjo marrëveshje do duhet të ishte parë më mirë nga kjo gjykatë dhe të mos anashkalohej siç u bë.

Vijmë te ky vendimi i fundit. Unë e kuptoj tendecën e Gjykatës Kushtetuese sa i takon mosmarrjes përsipër të kostove për të dhënë drejtësi, arrij ta nuhas dhe duket qartë. Bën një piruetë Gjykata Kushtetuese kur vjen puna te interpretimi i normave dhe sidomos te interpretimi përfundimtar duke i ndarë të drejtat dhe liritë e njeriut në disa fraksione. Të drejtat dhe liritë themelore të njëriut, thotë Kushtetuta në nenin 15 të saj janë të pandashme, të patjetërsueshme dhe qëndrojnë në themel të rendit tonë juridik. Tek liria e deputetit, gjykata i ndan. Lirinë e lëvizjes e lëvizjes e trajton në krahasim me të drejtën që ka deputeti, mbrojtjen që i ofron kushtetuta, ndërsa lirinë personale e trajton më vete. JO. Qoftë liria personale, qoftë dhe liria e lëvizjes hyjnë tek ajo normë e të drejtës, në një kapitull që përfshin lirinë dhe të drejtat vjetjake. Ç’ka do të thoqë që, n.q.s Kuvendi nuk ka dashur ta saktësojë ashtu siç GJK mendoi dhe e shprehu, nuk është Gjykata Kushtetuse ajo që duhet të shkuajë një normë të re, një kushtetutë, sepse interpretim nuk ka bërë. Ka shkruar një normë të re. Sepse interpretim nuk ka bërë. Interpretim nuk ka bërë. Në qoftë se Kuvendi ka thënë deputetit nuk mund të arrestohet, nuk mund t’i hiqet liria në çfarëdolloj forme apo ndaj tij nuk mund të ushtrohet kontroll banese dhe personal, ky paragraf nuk mund të shikohet i veçuar kështu si Gjykata Kushtetuese e ka parë vetëm me nenin 38, por duhet parë në tërësi dhe kontekstin e saj duke iu referuar edhe parashikimeve të Kodit të Procedurës Penale.”,- tha Dervishaj.

Më tej konstitucionalisti theksoi se Kuvendi i ka ndarë masat kufizuese për deputetin dhe nëse Kuvendi do të donte mund ta kishte përcaktuar ndryshe.

“Apriori do të thotë që në çështjen që ka në shqyrtim ende të pazgjidhur në gjykimin kushtetues, pra të arrestit në shtëpi,  automatikisht Gjykata Kushtetuese e ka shprehur mendimin e saj që ai vendim duhet shfuqizuar. Në qoftë se e ka në lëndë shqyrtimi nuk duhet të vononte, bile në qoftë se e ka të adminitruar do duhet t’i bashkonte bashkë dhe të mabronte punë.

Kryetari i grupit parlamentar të PD-së, Gazment Bardhi ka reaguar pas miratimit të rezolutës së asamblesë politike të Partive Popullore Europiane për gjendjen e rëndë të demokracisë në Shqipëri.

Sipas Bardhit, rezoluta e miratuar sot nga Partitë Popullore Europiane (EPP), familja më e madhe politike në Parlamentin Europian, rikonfirmon edhe njëherë ndërkombëtarisht që të gjitha shqetësimet e ngritura nga opozita në Shqipëri, për gjendjen dramatike ku ndodhet vendi, janë legjitime dhe të drejta.

Në Rezolutën e miratuar EPP shpreh shqetësimet e saj lidhur me:

Gjendjen e integritetit institucional që reflektohet në korrupsion endemik dhe mungesën e zgjedhjeve të lira dhe të ndershme sipas standardeve të OSBE-së;

Çdo persekutim politik të pretenduar ndaj liderëve të opozitës, deputetëve dhe zyrtarëve të pushtetit vendor, që po përballen me kufizime të motivuara politikisht të të drejtave të tyre civile;

Lidhjet ndërmjet trafikut të drogës dhe krimit të organizuar me elitën politike dhe me zyrtarët e zbatimit të ligjit, duke shfrytëzuar ekonominë dhe kuadrin politik të Shqipërisë për pastrimin e parave;

Dështimin për të arritur një marrëveshje për reformën zgjedhore, duke rezultuar në progres minimal në zbatimin e rekomandimeve të pazgjidhura nga OSBE/ODIHR dhe Komisioni i Venecias.

Përkeqësimin e ndjeshëm të peizazhit politik me afrimin e zgjedhjeve parlamentare të vitit 2025, i shënuar nga standarde të dobëta zgjedhore dhe kujton paligjshmërinë e përdorimit të burimeve publike gjatë fushatave elektorale;

Veprimet që kanë pakësuar më tej të drejtat kushtetuese të opozitës në Kuvend, duke reflektuar shkelje më të gjera ndaj deputetëve të opozitës.

Prandaj, Partia Popullore Evropiane (EPP):

U bën thirrje autoriteteve kombëtare të respektojnë angazhimet e Shqipërisë për të drejtat kushtetuese dhe standardet demokratike ndërkombëtare, duke siguruar një mjedis të drejtë dhe të hapur për të gjithë aktorët politikë dhe pa persekutim dhe frikësim të opozitës, veçanërisht me afrimin e zgjedhjeve;

Shpreh mbështetjen e palëkundur për përpjekjet e Partisë Demokratike drejt anëtarësimit në BE dhe përkushtimin e saj për të siguruar zgjedhje të lira dhe të ndershme, duke njohur rolin e tyre në mbështetjen e qeverisjes demokratike dhe mbrojtjen e të drejtave themelore dhe nënvizon të drejtën legjitime të opozitës për protesta paqësore;

I kërkon Kuvendit të Shqipërisë të intensifikojë përpjekjet e tij në mbështetjen e Komisionit për Reformën Zgjedhore për të nxitur një Kod Zgjedhor më gjithëpërfshirës dhe gjithëpërfshirës duke theksuar nevojën për të adresuar të gjitha rekomandimet prioritare të përcaktuara nga OSBE/ODIHR dhe duke theksuar se udhërrëfyesi i qeverisë duhet të përfshijë reformat zgjedhore të bazuara mbi udhëzimet e OSBE/ODIHR;

I kërkon autoriteteve shqiptare që të zbatojnë menjëherë reformat e kërkuara nga BE për të mbrojtur të drejtat e njeriut dhe për të siguruar një gjyqësor të pavarur dhe të paanshëm, pa ndërhyrje politike;

Thekson se zgjedhjet e lira dhe të ndershme përbëjnë shtyllën themelore të qeverisjes demokratike, duke kërkuar garanci për pavarësinë e administratës publike nga partia në pushtet. sn