TIRANE- “BalkanWeb” zbardh detaje të reja nga incidenti që u regjistrua tek protesta e Partisë Demokratike, ku një grua bërtiti me të madhe ‘Rroftë Edi Rama’ gjatë kohës që fliste ish-kryeministri Sali Berisha. Gazetarja Dorjana Bezat raporton për “BalkanWeb” se Eklarina Hoxha, militante e Partisë Socialiste, aktualisht mbahet në Komisariatin nr1 në kryeqytet, për të parandaluar ndonjë përplasje të mundshme mes saj dhe protestuesve të opozitës, të cilët gjatë kohës që ajo fliste me zë të lartë duke lëshuar thirrje kundër Berishës dhe kësaj nisme, u acaruan.
Po ashtu “BalkanWeb” ka arritur të mësoj se çfarë ka dëshmuar gruaja në polici, ndërsa ajo është justifikuar me veprimin e saj dhe se nuk kishte bërë asgjë të keqe.

“Nuk bëra asgjë. Thashë vetëm atë që ndieja; Rroftë Edi Rama. Kjo është bindja ime”, mësohet të jetë shprehur para oficerëve të policisë Eklarina Hoxha.

INCIDENTI
Incidenti në fjalë ndodhi sot në çadrën e protestës së opozitës ndërsa ish-kryeministri Sali Berisha iu fliste protestuesve. Gazetarja Elda Menga raportoi për “BalkanWeb” se ndërsa Berisha fliste, gruaja ka ndërhyrë gjatë gjithë kohës duke dashur ta ndërpriste. Ajo fliste kundër Berishës dhe kjo gjë ka irrituar mbështetësit e opozitës të mbledhur në çadër. Në një moment ish-kryeministri iu ka bërë shenjë me dorë protestuesve për të thënë që “nuk ka problem”. Por pavarësisht kësaj gruaja ka vijuar të flasë dhe më pas protestuesit e kanë tërhequr dhe e kanë nxjerrë jashtë nga çadra. Ndërsa qëndronte para godinës së Kryeministrisë, ku janë vendosur barrikadat, gruaja ka vijuar të shajë Berishën dhe mbështetësit e PD-së.

“Doni të vini ju në pushtet duke thyer xhamat e duke shpuar gomat. Po lekët që mi morët mua. Mashtrusa. Rroftë Edi Rama!”, ka thënë gruaja. Kaq është dashur që protestuesit t’i sulen për ta goditur por deputetja demokrate Majlinda Bregu ka ndërhyrë dhe është përpjekur të qetësojë mbështetësit. Ndërsa është marrë në mbrojtje nga Bregu, ka ardhur një makinë policie dhe efektivët e kanë marrë gruan me vete.