Sipas shtypit gjerman, ekuipazhi i një anijeje ruse në Detin Baltik qëlloi me municion sinjalizues në një helikopter të Bundeswehr-it, i cili po kryente një mision zbulimi.

Ministrja e Jashtme gjermane Annalena Baerbock përmendi incidentin në periferi të një takimi të NATO-s në Bruksel, por nuk dha detaje.

Baerbock njoftoi se mbikëqyrja e tubacioneve dhe kabllove të të dhënave në Detin Baltik do të rritej pasi kërcënimet hibride nga Rusia dhe mbështetësit e saj ishin në rritje. Përdorimi i municionit sinjalizues lejohet vetëm në raste urgjente.

Incidenti ndodhi në sfondin e rritjes së tensioneve në rajon.

Muajin e kaluar, dëmtimi i dy grupeve të kabllove të komunikimit në Detin Baltik – që lidh Finlandën me Gjermaninë dhe Suedinë e Lituaninë – në më pak se një ditë ka tërhequr vëmendjen e autoriteteve për nënshtrime të mundshme.

Suedia, Gjermania dhe Lituania nisën të gjitha hetimet javën e kaluar, duke parë rolin që anija kineze Yi Peng 3 luajti në incident, pasi ajo ishte në afërsi të kabllove të dëmtuara në atë kohë.

Gazetarët tanë po punojnë për këtë histori dhe do ta përditësojnë atë pasi të ketë më shumë informacione./ Euronews – Syri.Net

Vendet anëtare të NATO-s janë pajtuar për ta bërë prioritet të lartë mbrojtjen e infrastrukturës së Ukrainës, tha të mërkurën shefi i aleancës ushtarake, Mark Rutte.

Rusia është duke i bombarduar pareshtur qytetet dhe qytezat ukrainase me raketa dhe dronë.

Duke folur për gazetarë para ditës së dytë të takimit të ministrave të Jashtëm të 32 vendeve anëtare të NATO-s, Rutte tha gjatë takimi është biseduar për t’i dhënë Ukrainës sisteme të mjaftueshme për mbrojtje ajrore në mënyrë që ajo ta mbrojë infrastrukturën e vet nga sulmet ruse.

“Pati pajtueshmëri të qartë mbrëmë se mbështetja e Ukrainës, posaçërisht për infrastrukturën e saj, duhet të jetë prioritet”, tha Rutte.

“Besoj se aleatët do të sigurohen në ditët dhe javët në vazhdim se do ta furnizojnë Ukrainën me çfarëdo që mund ta furnizojnë”, tha ai.

Ky është dimri i tretë radhazi që Rusia e sulmon infrastrukturën energjetike të Ukrainës, dhe si pasojë ka shkaktuar viktima dhe ka penguar furnizimin me energji elektrike për mijëra civilë.

Mëngjesin e së mërkurës, dronë rusë sulmuan rajonin verior të Çernihivit, duke dëmtuar disa shtëpi në një fshat, tha guvernatori rajonal Vyacheslav Chaus në Telegram.

Në rajonin qendror të Vinnytsya, mbetjet e një droni të rrëzuar shkaktuan zjarr në një shtëpi në distriktin Haisin, duke e shkatërruar pjesërisht atë, tha Shërbimi i Emergjencave të Ukrainës.

Ndërkohë, Forca Ajrore e Ukrainës raportoi se Rusia i përdori një raketë dhe 50 dronë ndaj objektivave në Ukrainë.

Mbrojtja ajrore e Ukrainës i rrëzoi 29 dronë në nëntë rajone – Kiev, Harkiv, Poltava, Sumi, Çernihiv, Hmelnitski, Ternopil, Mikolaiv dhe Donjeck, tha ajo.

Ndërkohë, shpërthime të fuqishme u raportuan gjatë natës në portin rus të Detit të Zi, Novorossiisk, i cili është nga qendrat kryesore për eksportet ruse të naftës dhe port i rëndësishëm ushtarak për një pjesë të flotës ruse të Detit të Zi.

Sirena ajrore u lëshuan në këtë pjesë dhe kryetari i Novorosiskut, Andrei Kravchenko, u bëri thirrje banorëve të strehohen për shkak të një sulmi me dron.

As Ukraina e as Rusia nuk kanë komentuar ende mbi shpërthimet. REL

Presidenti i Koresë së Jugut, Yoon Suk Yeol, ka shpallur gjendje lufte, duke e akuzuar opozitën se është “forcë antishtetërore” dhe duke thënë se po vepron për të mbrojtur vendin nga “kërcënimet” që paraqet Koreja e Veriut.

Asambleja Kombëtare u mbyll mbrëmjen e 3 dhjetorit dhe helikopterët u panë duke bërë ulje në çatinë e Parlamentit, teksa shefi i ushtrisë, gjenerali Park An-su, mori përsipër komandën sipas vendimit për shpalljen e gjendjes së luftës dhe menjëherë lëshoi dekretin që ndalon “të gjitha aktivitetet politike”.

Qindra protestues u mblodhën para Parlamentit duke kërkuar që të lejohen të hyjnë brenda, teksa Policia ruajti ndërtesën dhe forcat speciale tentuan të hynin.

Koreja e Jugut është aleate e madhe e Shteteve të Bashkuara në Azi dhe një zëdhënës i Këshillit të Sigurisë Kombëtare të SHBA-së tha se Uashingtoni “po monitoron nga afër situatën”.

Njoftimi i befasishëm i Yoonit – kjo është hera e parë në mbi 40 vjet që Koreja e Jugut shpall gjendje lufte – erdhi në kohën kur partia e tij dhe opozita po përplasen për buxhetin.

“Për të ruajtur Korenë e Jugut si vend liberal nga kërcënimet që paraqesin forcat komuniste të Koresë së Veriut dhe për të eliminuar elementet antishtetërore që rrëmbejnë lumturinë dhe lirinë e njerëzve, shpall gjendje emergjente lufte”, tha Yoon gjatë adresimi drejtuar kombit.

Ai nuk dha detaje lidhur me kërcënimet sa i përket Veriut, por Jugu teknikisht është në luftë me Phenianin që ka armë bërthamore.

“Duke shpërfillur jetën e njerëzve, partitë opozitare kanë paralizuar qeverisjen vetëm për shkak të qëllimit për shkarkime, hetime speciale dhe për të mbrojtur liderët e tyre nga drejtësia”, tha Yoon.

“Asambleja jonë Kombëtare është bërë strehë për kriminelët, një strofull e diktaturës që kërkon të paralizojë sistemin gjyqësor dhe administrativ dhe të përmbysë rendin tonë liberal e demokratik”, shtoi ai.

Me shpalljen e gjendjes së luftës, të gjitha njësit ushtarake në Jug janë urdhëruar që të forcojë gatishmërinë e tyre emergjente dhe të reagimit, raportoi agjencia e lajmeve Yonhap.

Kina, aleate e Koresë së Veriut, u bëri thirrje shtetasve të saj që gjenden në Jug që të rrinë të qetë dhe të jenë të kujdesshëm.

Shefi i ushtrisë, Park, po ashtu ndaloi “veprimet që nuk e pranojnë apo kërkojnë përmbysjen e sistemit demokratik liberal, përfshirë përmes përhapjes së lajmeve të rreme, manipulimit të opinionit publik dhe propagandës së rremë”.

Presidenti e cilësoi opozitën, që ka shumicën në Parlamentin prej 300 ulësesh, si “forcë antishtetërore që synon të përmbysë regjimin”.

Yoon e përshkroi vendimin për shpalljen e gjendjes së luftës “si të pashmangshme për të garantuar vazhdimësinë e Koresë së Jugut si shtet liberal”, duke shtuar se vendimi nuk do të ketë ndikim në politikën e jashtme të shtetit.

“Do ta rikthej shtetin në normalitet duke hequr qafe forcat antishtetërore sa më shpejt që të jetë e mundur”, tha ai.

Ai tha se situata aktuale në Korenë e Jugut “është buzë kolapsit, me Asamblenë Kombëtare që po vepron si një përbindësh që synon rrëzimin e demokracisë liberale”.

Partia Fuqia e Popullit e Yoonit dhe partia kryesore opozitare, Partia Demokratike, janë duke u përplasur për buxhetin e vitit të ardhshëm.

Deputetët opozitarë javën e kaluar miratuan zvogëlimin e buxhetit, përmes Komisioneve parlamentare.

Opozita ka shkurtuar afër 2.8 miliardë dollarë nga buxheti i propozuar nga Yooni. Yoon propozoi që buxheti të ishte në vlerë prej 677 trilionë dollarësh. Por, opozita ka shkurtuar fondet e Qeverisë dhe për aktivitetet e zyrës së Yoonit, të prokurorisë, Policisë dhe agjencisë shtetërore të auditimit.

Yoon, ish-prokuror, ka akuzuar deputetët opozitarë se kanë shkurutar “të gjitha shpenzimet thelbësore për funksionimin e shtetit, sikurse është lufta kundër trafikimit të drogës dhe siguria publike… duke e kthyer shtetin në një strehë për trafikantët e drogës dhe kaos sa i përket sigurisë publike”. REL

Zyrtarët palestinezë thanë se Fatahu dhe Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – janë afër arritjes së një marrëveshjeje për caktimin e një komiteti politik të teknokratëve të pavarur për të administruar me Rripin e Gazës pasi të përfundojë lufta.

Nëse arrihet një marrëveshje e tillë, atëherë në mënyrë efektive do t’i jepte fund sundimit të Hamasit në Gazë dhe do të mund të ndihmonte në avancimin e bisedimeve për armëpushim me Izraelin.

Fraksionet rivale kanë bërë disa tentime të dështuara për t’u pajtuar që kur Hamasi mori pushtetin në Gazë më 2007. Izraeli ndërkaq ka hedhur poshtë mundësinë që Hamasi apo Fatahu të kenë ndonjë rol në Gazën e pasluftës.

Fatahu dominon në Autoritetin Palestinez, që mbështetet nga Perëndimi.

Një zyrtar i Autoritetit Palestinez konfirmoi më 3 dhjetor se një marrëveshje është arritur pas bisedime disajavore në Kajro. Zyrtari tha se komiteti do të kishte 12-15 anëtarë, shumica nga ta nga Gaza.

Ky komitet do t’i raportonte Autoritetit Palestinez, i cili ka selinë në Bregun e pushtuar Perëndimor, dhe do të punonte me palët lokale dhe ndërkombëtare për të lehtësuar ndihmën humanitare dhe rindërtimin e Gazës.

Një zyrtar i Hamasit tha se grupi radikal dhe Fatahu janë pajtuar për termat e përgjithshëm, por ende po negociojnë për disa detaje dhe për individët që do të ishin pjesë e komitetit. Ky zyrtar tha se marrëveshja do të bëhet publike pas një takimi të të gjitha fraksioneve palestineze në Kajro, pa dhënë një afat se kur do të mund të ndodhë kjo.

Dy zyrtarët folën në kushte anonimiteti, pasi nuk ishin të autorizuar që të flisnin me gazetarët për këto negociata.

Izraeli ende nuk ka reaguar për këto raportime.

Kryeministri izraelit, Benjamin Netanyahu, është zotuar se shteti i tij do të vazhdojë luftën në Gazë derisa Hamasi të zhbëhet dhe dhjetëra pengje të lirohen. Ai ka thënë se Izraeli do të mbajë për një afat të pacaktuar kontrollin e Gazës, teksa çështjet civile do të administrohen nga palestinezët që nuk janë të lidhur me Autoritetin Palestinez apo Hamasin.

SHBA-ja ka bërë thirrje për revitalizimin e Autoritetit Palestinez në mënyrë që të qeverisë me Bregun Perëndimor dhe Gazën para formimit të një shteti të mundshëm. Qeveria izraelite, që kundërshton një shtet palestinez, raportohet se ka diskutuar për planet e pas luftës me Emiratet e Bashkuara Arabe, me të cilën ka normalizuar raportet më 2020. Emiratet mbështesin një fraksion rival të Fatahut.

Zyrtari i Hamasit tha se marrëveshja do të përmbushte një nga qëllimet e luftës të Izraelit, që është dhënia fund e sundimit të Hamasit në Gazë.

Autoriteti Palestinez, që administron me pjesë të Bregut Perëndimor, njeh Izraelin dhe bashkëpunon për çështje të sigurisë, një politikë që nuk është popullore në mesin e palestinezëve, pasi shumë prej tyre e shohin si ndihmës të pushtimit.

Lufta në Gazë nisi në tetor të vitit 2023, pasi Hamasi sulmoi Izraelin, duke vrarë afër 1.200 persona – shumica civilë – dhe duke rrëmbyer afër 250 të tjerë. Edhe afër 100 pengje besohet se janë në Gazë dhe të paktën një e treta e tyre besohet se kanë vdekur.

Si pasojë e ofensivës hakmarrëse izraelite, në Gazë janë vrarë më shumë se 44.000 palestinezë, shumica gra dhe fëmijë. REL

Paraja vazhdon të jetë motor i zhvillimit ekonomik, dhe në vitin 2024, ka më shumë pasuri në qarkullim se kurrë më parë. Sipas listës më të fundit të miliarderëve të botës nga Forbes, janë regjistruar një numër rekord prej 2,781 miliarderësh, me një pasuri totale që arrin në 14.2 trilionë dollarë, gjithashtu një tjetër rekord historik. Miliarderët vijnë nga 78 vende, duke shënuar një rritje krahasuar me 77 vende që figuronin në listën e vitit të kaluar.

Shtetet e Bashkuara mbeten vendi që udhëheq me numrin më të madh të miliarderëve, me 813 qytetarë miliarderë që disponojnë së bashku një pasuri prej 5.7 trilionë dollarësh, të dyja shifra rekord. Klasa miliardere amerikane është 1.2 trilion dollarë më e pasur se vitin e kaluar, për shkak të 97 personave të rinj që u bashkuan ose u rikthyen në listë. Disa prej emrave të njohur që u përfshinë janë Taylor Swift, Magic Johnson dhe Sam Altman, CEO i OpenAI.

Nga 20 më të pasurit në botë, 14 janë amerikanë, përfshirë 8 nga 10 më të pasurit. Sidoqoftë, Bernard Arnault, CEO i LVMH, mbetet njeriu më i pasur në botë me një pasuri të vlerësuar prej 233 miliardë dollarësh.

Në vendin e dytë për numrin e miliarderëve është Kina, me 406 individë, por kjo është një rënie në krahasim me vitin e kaluar, kur numri ishte 496, kryesisht për shkak të dobësimit të tregut të pronave dhe aksioneve. Pasuria totale e miliarderëve kinezë është 1.3 trilionë dollarë.

India, vendi më i populluar në botë, ka arritur një rekord prej 200 miliarderësh, duke shënuar një rritje prej 40% në pasuri, që tani kapin vlerën e 954 miliardë dollarëve. Dy indianë renditen në 20 më të pasurit në botë: Mukesh Ambani (numri 9) dhe Gautam Adani (numri 17).

Gjermania është renditur në vendin e katërt, me 132 miliarderë që zotërojnë së bashku 644 miliardë dollarë, ndërsa Rusia, pavarësisht ndikimit të luftës, ka parë një rimëkëmbje, me 120 miliarderë dhe një pasuri totale prej 537 miliardë dollarësh.

Nga risitë e këtij viti, është Luksemburgu, i cili ka tani miliarderin e tij të parë, Michael Gans, bashkëpronar i Supreme Group, si dhe Uruguai, që është rikthyer me dy miliarderët e tij të parë, Andres Bzurovski Bay dhe Sergio Fogel, themelues të dLocal.

Ky vit ka sjellë rritje të pasurisë për shumë individë dhe shtete, duke pasqyruar fuqizimin e ekonomive të ndryshme dhe rritjen e mundësive të biznesit në mbarë botën.

Vendet me më shumë miliarderë në 2024 (shifrat e pasurisë deri më 8 mars 2024):
-Shtetet e Bashkuara: 813 miliarderë | $5.7 trilionëMë i pasuri: Elon Musk ($195 miliardë)
-Kina: 406 miliarderë | $1.3 trilionëMë i pasuri: Zhong Shanshan ($62.3 miliardë)
-India: 200 miliarderë | $954 miliardëMë i pasuri: Mukesh Ambani ($116 miliardë)
-Gjermania: 132 miliarderë | $644 miliardëMë i pasuri: Klaus-Michael Kuehne ($39.2 miliardë)
-Rusia: 120 miliarderë | $537 miliardëMë i pasuri: Vagit Alekperov ($28.6 miliardë)
-Italia: 73 miliarderë | $302 miliardëMë i pasuri: Giovanni Ferrero ($43.8 miliardë)
-Brazili: 69 miliarderë | $231 miliardëMë i pasuri: Eduardo Saverin ($28 miliardë)
-Kanadaja: 67 miliarderë | $315 miliardëMë i pasuri: David Thomson & familja ($67.8 miliardë)
-Hong Kongu: 67 miliarderë | $330 miliardëMë i pasuri: Li Ka-shing ($37.3 miliardë)
-Mbretëria e Bashkuar: 55 miliarderë | $225 miliardëMë i pasuri: Michael Platt ($18 miliardë) sn

Shefi i Kombeve të Bashkuara, Antonio Guterres, ka thënë të hënën se situata në Gazë është “apokaliptike” dhe ka paralajmëruar se kushtet me të cilat përballen palestinezët në atë territor, mund të përbëjnë “krimet me të rënda ndërkombëtare”.

Duke e lëshuar një deklaratë në konferencën në Kajro, me qëllim të rritjes së ndihmës humanitare, Guterres i ka bërë thirrje komunitetit ndërkombëtar të “ndërtojë themelet për një paqe të qëndrueshme në Gazë, dhe përgjatë Lindjes së Mesme”.

Lufta në Gazë ka shpërthyer pas sulmeve të Hamasit – grupit të shpallur terrorist nga Shtetet e Bashkuara dhe Bashkimi Evropian – në jug të Izraelit, në tetor të vitit të kaluar, duke vrarë mbi 1.200 njerëz dhe duke marrë peng mbi 240 të tjerë.

Si pasojë e ofensivës hakmarrëse të Izraelit në Gazë janë vrarë më shumë se 44.000 njerëz, sipas të dhënave të autoriteteve shëndetësore palestineze.

“Kequshqyerja është në kulm. Sistemi shëndetësor është shembur”, ka thënë ai.

Shefi i OKB-së ka thënë se Gaza tani e ka “numrin më të madh të fëmijëve me gjymtyrë të amputuara”, dhe që “shumë prej fëmijëve po iu nënshtrohen operacioneve pa anestezion”.

Sekretari i Përgjithshëm i OKB-së ka qenë kritik edhe për kufizimet e ashpra në dërgim të ndihmës.

Sipas Agjencisë së OKB-së për Refugjatë Palestinezë (UNRWA) vetëm 65 kamionë me ndihma në ditë kanë arritur të hyjnë në Gazë muajin e kaluar, në krahasim me rreth 500 para luftës.

Organizatat ndërkombëtare të ndihmës kanë përsëritur vazhdimisht se situata është alarmante dhe rrezikon të përkeqësohet edhe më shumë në Gazë, dhe që civilët po vuajnë më së shumti.

Sipas Guterresit, bllokadat për hyrje të ndihmave në Gazë nuk janë pasojë e “krizës logjistike”, por e “mungesës së vullnetit politik për respektim të parimeve themelore të ligjit ndërkombëtar”.

Disa përpjekje të Shteteve të Bashkuara dhe fuqive tjera për dhënie fund të kësaj lufte, kanë dështuar. REL

Presidenti rus Vladimir Putin ka miratuar planet e reja buxhetore, duke rritur shpenzimet ushtarake për vitin 2025 në nivele rekord, ndërsa Moska kërkon të mbizotërojë në luftën në Ukrainë.

Rreth 32.5% e buxhetit të postuar në një faqe interneti qeveritare të dielën është ndarë për mbrojtjen kombëtare, duke arritur në mbi 137 miliardë euro, nga 28.3% e raportuar këtë vit.

Ligjvënësit në të dy dhomat e parlamentit rus, Duma e Shtetit dhe Këshilli i Federatës, kishin miratuar tashmë planet në 10 ditët e fundit.

Lufta e Rusisë me Ukrainën, e cila filloi në shkurt 2022, është konflikti më i madh në Evropë që nga Lufta e Dytë Botërore dhe po shteron burimet e të dyja palëve.

Kievi merr miliarda dollarë ndihmë nga aleatët e tij perëndimorë, por forcat e armatosura të Rusisë janë më të mëdha dhe të pajisura më mirë, dhe në muajt e fundit ushtria ruse gradualisht po i shtyn forcat ukrainase në Ukrainën lindore.

Ukraina dhe Rusia shkëmbejnë sulme vdekjeprurëse me dron

Ndërkohë, në terren në Ukrainë, tre persona vdiqën në qytetin jugor Kherson kur një dron rus goditi një minibus të dielën në mëngjes, tha guvernatori rajonal Oleksandr Prokudin. Shtatë të tjerë u plagosën në sulm.

Dhe numri i të plagosurve në sulmin raketor të së shtunës në Dnipro në Ukrainën qendrore u rrit në 24, me shtatë në gjendje të rëndë, tha guvernatori i Dnipropetrovsk, Serhiy Lysak. Në sulm u vranë katër persona.

Moska dërgoi 78 dronë në Ukrainë gjatë natës së të dielës, thanë zyrtarët ukrainas. Sipas forcave ajrore të Ukrainës, 32 dronë u shkatërruan dhe 45 të tjerë dronë u humbën, me gjasë të jenë bllokuar në mënyrë elektronike.

Në Rusi, një fëmijë u vra në një sulm ukrainas me dron në rajonin Bryansk në kufi me Ukrainën, sipas guvernatorit rajonal Alexander Bogomaz.

Ministria e Mbrojtjes e Rusisë tha se 29 dronë ukrainas u rrëzuan gjatë natës së së dielës në katër rajone të Rusisë perëndimore: 20 mbi rajonin Bryansk, shtatë mbi rajonin e Kaluga dhe nga një mbi rajonet Smolensk dhe Kursk./.Euronews – Syri.Net

Një armëpushim midis Izraelit dhe grupit militant Hezbollah me seli në Liban hyri në fuqi të mërkurën herët në mëngjes, duke çuar në ndalimin e luftimeve që udhëheqësit amerikanë dhe francezë thanë se mund të hapin rrugën për një armëpushim edhe në Rripin e Gazës.

Ndërsa armëpushimi hyri në fuqi, një valë makinash po shkonin drejt Libanit jugor, ku disa muaj luftimesh të ngjeshura dhe urdhrat izraelitë për evakuim i detyruan banorët të largoheshin nga shtëpitë e tyre.

Ushtria izraelite paralajmëroi banorët të qëndrojnë larg fshatrave në të cilat kishte urdhëruar më parë evakuime.

Shtetet e Bashkuara, së bashku me Francën, luajtën një rol thelbësor në ndërmjetësimin e zgjidhjes, të cilën Kabineti i Sigurisë i Izraelit e miratoi të martën vonë.

Presidenti amerikan Joe Biden e quajti armëpushimin “një hap kritik … për t’i dhënë fund dhunës” në Lindjen e Mesme. Ai tha se Irani dhe përfaqësuesit e tij, Hezbollahu në Liban dhe militantët e Hamasit në Gaza, “kanë paguar një çmim të rëndë” në më shumë se një vit luftime ndaj forcave izraelite.

Ai tha se marrëveshja “është hartuar për të siguruar një ndërprerje të përhershme të armiqësive”.

Por, Presidenti Biden paralajmëroi që “nëse Hezbollahu ose dikush tjetër thyen marrëveshjen dhe përbën një kërcënim të drejtpërdrejtë për Izraelin, atëherë Izraeli ruan të drejtën për vetëmbrojtje në përputhje me ligjin ndërkombëtar, ashtu si çdo vend, në përballjen me një grup terrorist që synon shkatërrimin e atij vendi”.

Udhëheqësi në largim i SHBA-së, me më pak se dy muaj të mbetur në mandatin e tij katërvjeçar, tha se tani kur Hezbollahu ka rënë dakord për t’i dhënë fund sulmeve të tij ndaj Izraelit, “Hamasi ka një zgjedhje për të bërë. E vetmja rrugëdalje e tyre është lirimi i pengjeve (që po mban në Gaza), përfshirë qytetarët amerikanë”.

Kryeministri izraelit Benjamin Netanyahu tha se ai mbështet një armëpushim me Hezbollahun, në mënyrë që Izraeli të përqendrojë vëmendjen e tij në kërcënimin më të gjerë që paraqet Irani, të rifreskojë forcat e tij dhe të izolojë Hamasin në luftën e tij të vazhdueshme kundër Izraelit në Gaza.

Kryeministri Netanyahu u zotua se nëse Hezbollahu ripërtërinë sulmet e tij ndaj Izraelit ose riarmatoset, Izraeli do të rifillojë menjëherë bombardimet ndaj militantëve në Liban.

Lëvizja e kryeministrit Netanyahu drejt përfundimit të luftimeve gati 14 muajshe me Hezbollahun, pasoi një ditë sulmesh izraelite ndaj objektivave militantë në Liban.

Sulmi izraelit kishte në shënjestër 20 ndërtesa për të cilat ushtria tha se ishin fortesa të Hezbollahut, duke paralajmëruar banorët civilë që jetonin atje të largoheshin dhe të mbanin një distancë prej të paktën 500 metrash. Ky ishte numri më i madh i ndërtesave të shënjestruara në një ditë të vetme.

Sulmet dukej se ishin një përpjekje e fundit e Izraelit për të siguruar përparësi në luftën e tij me Hezbollahun. Militantët filluan të sulmojnë Izraelin në tetor të vitit 2023 në mbështetje të militantëve të Hamasit, që luftojnë me Izraelin në Gaza.

Marrëveshja e armëpushimit, e ndërmjetësuar nga diplomatët amerikanë dhe francezë, përfshin një ndërprerje luftimesh dhe një periudhë 60-ditore gjatë së cilës Izraeli dhe Hezbollahu do të tërhiqen nga Libani jugor.

Sipas marrëveshjes, forcat izraelite janë të detyruara të tërhiqen në jug të kufirit Liban-Izrael, ndërsa Hezbollahu të lëvizë në veri të lumit Litani. Plani kërkon që ushtria libaneze, e cila nuk është e përfshirë në luftimet Izrael-Hezbollah, të patrullojë rajonin midis dy palëve ndërluftuese.

Luftimet në Liban kanë shkaktuar një krizë humanitare, duke zhvendosur qindra mijëra njerëz.

Të hënën, Programi Botëror i Ushqimit i Kombeve të Bashkuara njoftoi se ka ofruar ndihmë urgjente për më shumë se gjysmë milioni njerëz në Liban që nga fillimi i konfliktit.

Në sulmin e tetorit 2023 ndaj Izraelit që shkaktoi luftën në Lindjen e Mesme, militantët e Hamasit vranë 1200 njerëz dhe kapën rreth 250 pengje. Izraeli thotë se beson që Hamasi po mban ende 101 pengje, duke përfshirë 35 që ushtria thotë se janë të vdekur.

Kundërsulmi i Izraelit në Gaza ka vrarë më shumë se 44,235 palestinezë, sipas ministrisë së Shëndetësisë të territorit, e cila nuk bën dallim midis luftëtarëve dhe civilëve në numërimin e saj. Ushtria izraelite thotë se numri i të vdekurve përfshin mijëra luftëtarë të Hamasit, ndërsa ministria e Shëndetësisë thotë se më shumë se gjysma janë gra dhe fëmijë.

Hamasi dhe Hezbollahu janë cilësuar si grupe terroriste nga Shtetet e Bashkuara, Mbretëria e Bashkuar dhe vende të tjera perëndimore.