Agjencia izraelite e spiunazhit Mossad vendosi një sasi të vogël eksplozivi brenda mijëra beepers të porositura nga Hezbollahu muaj përpara se pajisjet të shpërthenin, ka thënë një burim libanez i sigurisë për agjencinë e lajmeve Reuters.

Burimi tha se grupi militant kishte porositur 5000 beepers, të cilat disa burime të tjera thanë se ishin sjellë në Liban në pranverë.

I njëjti burim pohoi se pajisjet ishin modifikuar nga shërbimi sekret izraelit “në nivelin e prodhimit”.

Një burim i dytë sigurie i tha Reuters se deri në tre gram eksploziv ishin fshehur në beepers e rinj që mbetën “të pazbuluar” nga Hezbollahu për muaj të tërë.

Detajet nga raporti i Reuters janë të ngjashme me atë të New York Times, që citoi zyrtarë amerikanë dhe të tjerë.

Imazhet e pajisjeve të shkatërruara të analizuara nga Reuters treguan një format dhe ngjitëse që ishin në përputhje me modelin AR-924 të beepers me markën Gold Apollo – një kompani me bazë në Tajvan.

Themeluesi i firmës, Hsu Ching-Kuang, tha se pajisjet në fakt janë prodhuar me licencë në Evropë nga një firmë e quajtur BAC, duke përdorur emrin Gold Apollo.

Në një deklaratë të dhënë për Sky News kompania në Tajvan tha: “Apollo Gold Corporation ka krijuar një autorizim afatgjatë të etiketës private dhe bashkëpunim të agjencisë rajonale me BAC”.

“Sipas marrëveshjes, ne autorizojmë BAC të përdorë markën tonë për shitjet e prodhimit në rajone specifike, por dizajni dhe prodhimi i produkteve trajtohen tërësisht nga BAC”.

Apollo Gold nuk pranoi të jepte detaje të mëtejshme të firmës evropiane.

Nëntë persona u vranë dhe mijëra u plagosën rëndë në shpërthimet e së martës në pjesë të ndryshme të Libanit, tha ministri i shëndetësisë i vendit.

Firas Abiad tha se 200 nga 2750 të plagosurit ishin në gjendje kritike.

Zyrtarët libanezë ia hodhën fajin “agresionit izraelit”, ndërsa Hezbollahu premtoi të hakmerrej duke këmbëngulur se Izraeli do të merrte “ndëshkimin e tij të drejtë” për shpërthimet.

Ushtria izraelite, e cila ka qenë e angazhuar në luftime ndërkufitare me Hezbollahun që nga fillimi i luftës në Gaza në tetor të vitit të kaluar, ka refuzuar t’u përgjigjet pyetjeve në lidhje me shpërthimet.

Ekspertët pajtohen gjerësisht se shpërthimet nuk duken si një zjarr tipik i baterive litium.

Keren Elazari, një haker dhe studiues i sigurisë në Universitetin e Tel Avivit, tha se “nuk ka asnjë aftësi hakerimi në distancë që mund të gjenerojë atë lloj shpërthimi kinetik… një lloj komponenti fizik shpërthyes ndoshta ishte pjesë e ekuacionit”.

Eksperti i asgjësimit të bombave dhe ish-oficeri i ushtrisë britanike Chris Hunter shtoi se teoria e tij fillestare – bazuar në lëndimet – sugjeron se shpërthimet janë “në përputhje me një deri në dy ons eksploziv të fortë”.

“Ne e kemi parë këtë lloj metodë të veçantë me pajisje celulare më parë,” tha ai, duke treguar vrasjen e krijuesit të bombave nga Hamas, Yahya Ayyash, telefoni celular i të cilit ishte mbushur me një sasi të vogël eksplozivi.

Sipas korrespondentit të Sky News për Lindjen e Mesme, Alistair Bunkall, luftëtarët e Hezbollahut do t’i kishin konsideruar beepers një alternativë lo-fi, më të vështirë për t’u depërtuar ndaj telefonave celularë.

Kjo vjen pasi udhëheqësi i Hezbollahut, Hassan Nasrallah, paralajmëroi më parë anëtarët e grupit në shkurt që të mos mbanin telefona celularë sepse Izraeli mund t’i përdorte ato për të gjurmuar lëvizjet e tyre.REL