Më shumë se 250 miliarderë dhe milionerë po i bëjnë thirrje elitës politike të mbledhur në Forumin Ekonomik Botëror në Davos të vendosë taksa mbi pasurinë për të mbledhur fonde për shërbime publike më të mira në mbarë botën.

“Kërkesa jonë është e thjeshtë: Ne ju kërkojmë të na taksoni ne, më të pasurit në shoqëri”, thonë manjatët në letrën e tyre të hapur drejtuar liderëve botërorë. “Kjo nuk do të ndryshojë rrënjësisht standardin tonë të jetesës, nuk do t’i privojë fëmijët tanë nga asgjë, ose nuk do të dëmtojë zhvillimin ekonomik të kombeve tona. Por do ta kthejë pasurinë private ekstreme dhe joproduktive në një investim për të ardhmen tonë të përbashkët demokratike”.

Sipas The Guardian, nënshkruesit e pasur nga 17 vende përfshijnë trashëgimtaren e Disney, Abigail Disney, Brian Cox i cili luajti personazhin e miliarderit “Logan Roy” në serialin Succession, aktorin dhe skenaristin Simon Pegg dhe Valerie Rockefeller, trashëgimtare të dinastisë amerikane.

“Ne jemi njerëzit që përfitojmë më shumë nga status quo-ja ”, theksojnë personat e mësipërm dhe dhjetëra të tjerë në letrën e tyre me titull “Krenar për të paguar” , të cilën do të kërkojnë t’ua dërgojnë sot, të mërkurën, liderëve botërorë që ndodhen në Davos të Zvicrës. “Megjithatë, pabarazia ka arritur një pikë kthese dhe implikimet e saj për rrezikun e stabilitetit ekonomik, social dhe ekologjik po bëhen gjithnjë e më serioze. Me pak fjalë, ne kemi nevojë për veprim tani. ”

Sipas gazetës britanike, një sondazh i ri mes milionerëve tregoi se 74% mbështesin taksat më të larta mbi pasurinë për të trajtuar krizën e kostos së jetesës dhe për të përmirësuar shërbimet publike. Sondazhi, i kryer nga Survation në emër të Patriotic Millionaires, përfshiu më shumë se 2,300 të anketuar nga vendet e G20, të cilët zotërojnë më shumë se 1 milion dollarë në asete “të investueshme”, duke përjashtuar shtëpitë e tyre – dhe për këtë arsye i përkasin 5% më të pasur.

Sondazhi zbuloi se 58% mbështesin vendosjen e një takse mbi pasurinë prej 2% për njerëzit me më shumë se 10 milionë dollarë dhe se 54% besojnë se pasuria ekstreme është një kërcënim për demokracinë.

Biznesmeni britanik Guy Singh Watson, i cili filloi si fermer dhe themeloi kompaninë e shpërndarjes së perimeve Riverford, tha: “Ky sondazh tregon se e gjithë bota, përfshirë njerëzit më të pasur, dëshirojnë që ‘super të pasurit’ të tatohen. Edhe ne, më të pasurit, jemi të ngopur me mosveprim, kështu që ka kuptim të plotë që punëtorët, të cilët janë dëmtuar më së shumti nga ekonomitë tona të manipuluara, e kanë humbur plotësisht durimin”.

Sipas fituesit të Emmy dhe Golden Globe, Brian Cox, ne jetojmë në një epokë ku “miliarderët përdorin pasurinë e tyre ekstreme për të grumbulluar pushtet dhe ndikim politik, ndërsa minojnë demokracinë dhe ekonominë globale”. “Jemi shumë vonë për të vepruar. Nëse zyrtarët tanë të zgjedhur refuzojnë të merren me këtë përqendrim parash dhe pushteti, pasojat do të jenë të tmerrshme”, paralajmëron aktori skocez.

Vlen të theksohet se kjo nuk është hera e parë që miqtë i bëjnë të njëjtën kërkesë elitës politike të mbledhur në Forumin Ekonomik Botëror. Një nismë e ngjashme u ndërmor vitin e kaluar nga më shumë se 200 milionerë nga 13 vende. Përsëri në një letër të hapur, milionerët – duke përfshirë yllin e Poor Things, Mark Ruffalo dhe disa nga nënshkruesit e këtij viti – kërkuan taksimin për të trajtuar pabarazinë në vendet e tyre.

(BalkanWeb)